Muqdisho, Isniin 4ta June 2018

Xaflad lagu soo bandhigayay daraasaddan ayaa maanta lagu qabtay xarunta akadeemiyada Cilmiga, Fanka iyo Suugaanta ee magaallada Muqdisho.
Daraasaddan oo ay hay’adda Iftin ku howlanayd bilihii ugu dambeeyay ee sanadkii hore waxaa ka qaybqaatay ilaa 36 Jaamacdood oo ku kala yaalla 14 magaalo oo dalka ka mida kuwaas oo kala ah: Muqdisho, Boosaaso, Gaalkacyo, Garoowe, Baladweyn, Jowhar, Baydhabo, Kismaayo, marka, Qardho, Buuhoodle, Goldogob, Ceerigaabo, iyo Dhuusomareeb.

Ardayda guud ahaan sanadkii hore 2017 ka soo qalinjebisay Jaamacadaha dalka ayaa waxay gaarayaan ilaa 11,263 arday, iyadoo tirada wiilashu ay ahaayeen 7,460 taas oo ah 66% halka tirada gabdhuhuna ay gaarayeen 3,803 taas oo ayana u dhiganta 34%.
Tirada guud ee ardayda ee ah 11,263, waxaa magaallada Muqdisho keligeed ka soo qalinjebiyay 8,481 taas oo wadarta guud ka ah 75.30% oo u dhiganta 3/4.

Sahankan oo ah kii labaad oo ay samayso IFTIN FOUNDATION ayaa muujinaya tirada kulliyadaha ay ardaydaasi ka soo qalinjebiyeen kuwaas oo gaaraya 25 kulliyadood, sidoo kale waxay xogtani muujisay in saddexda kulliyadood ee ay ka soo baxeen ardeyda ugu badan ay kala yihiin:-

1. Maamulka Hawlaha (Business Administration) sida Accounting, Human Resources, Banking & Finance) oo tirada ka soo baxday ay gaareyso 1,732 qof taas ah 15.38%;
2. Kalkaaliyennimo iyo Umulisonnimo (Nursing & Midwifery) oo ay ka soo baxeen 1,503 qof taas ah 13.34%, iyo
3.Maamulka Guud (Public Administration) oo ay ka soo baxeen 1,316 qof taas oo ah 11.68%.

Halka saddexda kulliyadood ee ay ka soo baxeen ardeyda ugu yar ay kala ahaayeen:-

1. Tirakoobka iyo Qorsheynta (Statistics & Planning) oo ay ka soo qalinjebiyeen 11 arday keliya oo u dhiganta 0.10%.
2. Culuunta Siyaasadda (Political Science) oo ay ka soo qalinjebiyeen 18 arday taas oo u dhiganta 0.16%; iyo
3. Saxaafadda (Journalism) oo ay ka soo baxeen 33 qof taas oo ayana u dhiganta 0.29%.

Dhinaca kale Gabdhaha ugu badan waxay ka soo qalinjebiyeen saddexda kulliyadood ee kala ah:-
1) Nursing & Midwifery (1,125 gabdhood);
2) Public Health (655 gabdhood) iyo
3) Business Administration (370 gabdhood).

Halka wiilasha ugu badan ay ka soo qalinjebiyeen saddexda kulliyadood ee kala ah:-
1) Business Administration (1,362 wiil)
2) Computer Science & IT (1,118 wiil) iyo
3) Public Administration (1,048 wiil)

Daraasaddan ayaa sidoo kale muujisay sida jaamacadaha dalka ugu kala badan yihiin soo saarista ardayda jaamiciyiinta ah, 10ka jaamacadood ee ardayda ugu badan soo saaray waxay kala yihiin:- University of Somalia UNISO, Jobkey, East Africa (Boosaaso), Horseed, Plasma, Muqdisho, Salaam, SIMAD, Somali International University SIU iyo Benadir University.

Dhinaca kale Hay’adda IFTIN FOUNDATION waxay xafladdaasi ku soo bandhigtay qaab casri ah oo lagu hubinayo shahaadooyinka dalka, kaas oo lagu magacaabo eCheck Somalia.

“Echeck Somalia waa adeeg electronic ah oo lagu kalsoonaan karo, wuxuuna u sahlayaa cid kasta oo dalka gudihiisa iyo dibaddiisa joogta hubinta shahaadooyinka dugsiyada sare iyo kuwa jaamacadaha” Sidaa waxaa yiri Guddoomiyaha Hay’adda IFTIN FOUNDATION Mudane C/llaahi Maxa’ed Xasan “Black”.

Wuxuuna intaa ku daray in hubinta shahaadooyinka ay leeyhiin hay’adaha soo saaray shahaadooyinkaas sida Wasaaradda Waxbarashada, Jaamacadaha iyo dalladaha Waxbarashada, balse eCheck ay tahay aalad sahlaysaa howshaas.

Xafladdaan waxaa ka hadlay Masuuliyiin ay ka mid yihiin Wasiirudowlaha Wasaaradda Waxbarashada Mudane Craxmaan Max’ud “Jaabiri”, Agaasimaha Arrimaha Bulashada ee Wasaaradda Shaqada iyo Arrimaha Bulshada Mudane Ismaaciil Macallin C/llaahi, Agaasime ku xigeenka Maamulka ee Rugta Ganacsiga Mudane Haashim Ducaale, Xoghayaha Guud ee Ururka Jamacadaha Soomaaliyeed Mudane C/kariin Xasan Jaamac iyo Guddoomiyaha Dalladda Waxbarashada ee SAFE, Mudane Craxmaan Macallin Axmed “Ablaal” iyo masuuliyiin kale.